ആന്ധ്രയിൽ യുവതിയെ കൊന്ന് 10 കഷ്ണങ്ങളാക്കി തള്ളി; ഇറച്ചിവെട്ടുകാരൻ ഷാഫി പിടിയിൽ

ആന്ധ്രപ്രദേശിലെ ഇബ്രാഹിംപട്ടണത്ത് യുവതിയെ കൊലപ്പെടുത്തി മൃതദേഹം കഷ്ണങ്ങളാക്കി കനാലിൽ തള്ളിയ കേസിൽ ഇറച്ചിവെട്ടുകാരൻ മുഹമ്മദ് ഷാഫിയെ പോലീസ് കണ്ടെത്തി. സെപ്റ്റംബർ 18-ന് കനാലിൽ കണ്ടെത്തിയ സ്ത്രീയുടെ തലയില്ലാത്ത ശരീരഭാഗങ്ങൾ കേന്ദ്രീകരിച്ച് നടത്തിയ അന്വേഷണമാണ് ക്രൂരകൃത്യം പുറത്തുകൊണ്ടുവന്നത്. കയ്യിലെ പച്ചകുത്തൽ തിരിച്ചറിഞ്ഞാണ് കൊല്ലപ്പെട്ടത് കല്യാണിയാണെന്ന് സ്ഥിരീകരിച്ചത്. സാമ്പത്തിക തർക്കവും കല്യാണിയുടെ കുട്ടിയെ വളർത്തുന്നതുമായി ബന്ധപ്പെട്ട തർക്കവുമാണ് കൊലപാതകത്തിലേക്ക് നയിച്ചത്. മൃതദേഹം കശാപ്പുകത്തി ഉപയോഗിച്ച് പത്തു കഷ്ണങ്ങളാക്കി വിവിധ ഭാഗങ്ങളിൽ ഉപേക്ഷിക്കുകയായിരുന്നു. കൊലപാതകത്തിൽ മറ്റാരുടെയെങ്കിലും സഹായം ലഭിച്ചിട്ടുണ്ടോ എന്ന് പോലീസ് അന്വേഷിക്കുന്നു.