പശ്ചിമേഷ്യയിൽ വീണ്ടും സംഘർഷം; വിമാനങ്ങൾ വൈകി; മലയാളിക്ക് സൗദിയിൽ വധശിക്ഷ

യുദ്ധം അവസാനിപ്പിക്കാൻ ഇറാൻ മുന്നോട്ടുവെച്ച നിർദ്ദേശങ്ങൾ യുഎസ് തള്ളിയതോടെ പശ്ചിമേഷ്യയിൽ വീണ്ടും കടുത്ത സംഘർഷാവസ്ഥ ഉടലെടുത്തു. ഹോർമൂസ് കടലിടുക്കിൽ നിന്ന് രഹസ്യവിവരങ്ങൾ ചോർത്താൻ ശ്രമിച്ച അമേരിക്കൻ അന്തർവാഹിനി തങ്ങൾ പിടിച്ചെടുത്തതായി ഇറാൻ അവകാശപ്പെട്ടു. യുഎസ് തിരിച്ചടിച്ചാൽ നേരിടാൻ പൂർണ്ണ സജ്ജമാണെന്നും യുദ്ധതന്ത്രങ്ങൾ തയ്യാറാക്കിയിട്ടുണ്ടെന്നും ഇറാൻ വിദേശകാര്യമന്ത്രി അബ്ബാസ് അരാഖ്ചി മുന്നറിയിപ്പ് നൽകി. മേഖലയിലെ അനിശ്ചിതാവസ്ഥയെ തുടർന്ന് യുഎഇയിലേക്കും തിരിച്ചുമുള്ള 46 ഓളം അന്താരാഷ്ട്ര വിമാന സർവീസുകൾ റദ്ദാക്കുകയോ വൈകുകയോ ചെയ്തു. സുരക്ഷാ സാഹചര്യങ്ങൾ കണക്കിലെടുത്ത് സൗദി തലസ്ഥാനമായ റിയാദിലെ സ്കൂളുകൾ ഈ ആഴ്ച ഓൺലൈൻ പഠനത്തിലേക്ക് മാറ്റി. യുകെയിലെ ആർഎഎഫ് ഫയർഫോർഡ് വ്യോമത്താവളത്തിന് സമീപം സ്ഫോടക വസ്തുക്കളുമായി എത്തിയ ചിലർ അറസ്റ്റിലായി. വാഹനങ്ങളുടെ ലൈസൻസ് പ്ലേറ്റുകൾ മറച്ചുവെക്കുന്നവർക്കെതിരെ സൗദി ട്രാഫിക് ഡയറക്ടറേറ്റ് കനത്ത പിഴ ഏർപ്പെടുത്തി. ലോക ഹൃദയദിനത്തോടനുബന്ധിച്ച് ഒമാൻ ആരോഗ്യമന്ത്രാലയം സേവ് എ ഹാർട്ട് ക്യാമ്പയിൻ ആരംഭിച്ചു. ദുബായിൽ ഡ്രൈവറില്ലാ വാഹനങ്ങളുടെ സാങ്കേതിക പരിശോധനയ്ക്കായി പുതിയ മൊബിലിറ്റി ലാബ് പ്രവർത്തനം തുടങ്ങി. ഖരീഫ് സീസൺ പൂർത്തിയായതോടെ ദോഫാറിൽ ഒട്ടകങ്ങളുടെ മലനിരകളിലേക്കുള്ള മടക്കയാത്ര Katl Al Ibil ആരംഭിച്ചു. ന്യൂയോർക്കിൽ ഒമാൻ, ഇന്ത്യൻ വിദേശകാര്യ മന്ത്രിമാർ തമ്മിൽ കൂടിക്കാഴ്ച നടത്തി. മയക്കുമരുന്ന് കടത്ത് കേസിൽ കണ്ണൂർ സ്വദേശി അബൂട്ടി വെള്ളിയുടെ വധശിക്ഷ സൗദിയിലെ ദമാമിൽ നടപ്പാക്കി.